28.2.63

"ผญาทำนายเหตุการณ์โลกเมื่อถึงกึ่งพุทธกาล" ซอมเบิ่งเด้อสองพันห้าโลกาสิไหวหวั่น โลกสิผันเปลี่ยนปิ้นหินแผ่นล้านสิลอยน้ำดังสโนว์




"ผญาทำนายเหตุการณ์โลกเมื่อถึงกึ่งพุทธกาล"ซอมเบิ่งเด้อสองพันห้าโลกาสิไหวหวั่นโลกสิผันเปลี่ยนปิ้นหินแผ่นล้านสิลอยน้ำดังสโนว์คนสิโสเสียถิ้มของดีมีคุณค่าไปเอาหมากน้ำเต้าของเบานั้นว่าดี
แก่นจันทน์มีค่าล้ำผัดนำไปแลกตะกั่วเจ้าหัวถมแม่น้ำนทีกว้างขาดเขิน ....



เบิ่งกันดีๆพี่น้องเอ๋ย...ประเทศชาดสิลมจม เพราะความโลภของมนุษย์

  • เงินสิเป็นพระเจ้าข้าวสิเกิดเป็นหนอน

  • ไม้ไผ่อ่อนไล่คาบช้างกวางฟานเต้นไล่เสือ

  • เมียบ่ยำเกรงย้านผัวตนคือเก่า

  • ฝูงลูกเต้าบ่ฟังเฒ่าพ่อแม่ตน

  • คนสิเกิดเดือดฮ้อนบ่คือก่อนคราวหลัง

  • ศิษย์บ่ฟังคำครูด่าเถียงบ่เกรงย้าน

  • อันธพาลสิมีหน้าพาลาสิเป็นใหญ่

  • ไพร่กระจอกงอกง่อยสิเป็นเจ้านั่งเมือง

  • เคยฮุ่งเฮืองกลายเป็นเศร้าบ้านเมืองเฮาสิเป็นป่า

  • วัดสิกลายเป็นบาร์พระสิเป็นไก่น้อยข้าวสารเต้นคาบคอ

  • จบละน้อบ่อนหั่นสองพันปลายใกล้สิหม่อ

  • จอต่อกุนผัดแห่งฮ้ายไฟสิไหม้ทั่วแผ่นดิน

  • ฝนตกรินน้ำถ่วมข้าวทั้งภูเขาดินถล่ม

  • เกิดลมใหญ่พัดบ้านเพม้างหมุ่นสลาย

  • แผ่นดินไหวโลกสะอื้นคลื่นใหญ่สึนามิ

  • จักสิทำแนวใด๋จังสิหนีไปพ้น

  • ขนของหนีจากคลื่นขึ้นฝั่งมาเจอปืนใหญ่

  • สงครามลุกเป็นไฟฆ่ากันตายทุกหย่อมหญ้าบ่มีเว้นแต่ละวัน

  • ใผก็กัดฟันสู้ดุดันหันปืนใส่

  • ยิงกันตายบ่หน่อยหลายร้อยนับบ่ไหว

  • ทั้งเกิดเจ็บป่วยไข้ตายไปน่าอนาถ

  • โรคระบาดพยาธิฮ้ายหายาแก้กะบ่มี

  • โลกเฮานี้จังแม่นเกิดอุบาทว์ฮ้ายต่างจากเก่าคราวหลังแท้นอ

  • เพราะพวกเฮาขาดศีลธรรมจังได้เป็นแนวนี้

  • ไล่คนดีออกจากบ้านไปเอาพาลมาตุ้มไพร่

  • ภัยพิบัติเกิดขึ้นเมืองบ้านก็วุ่นวาย

  • ทั้งเกิดโจรผู้ฮ้ายยาดยิงชิงของ

  • ไผ่ผู้มีเงินทองสินั่งยามจนแจ้ง

  • ข้าวของแพงการขายซื้อมันบ่คือตั้งแต่เก่า

  • เพราะคนเฮาใจบาปฮ้ายบ่มีเอื้ออ่าวธรรม

  • ยุคผู้นำหมดศีลห้าโลกาสิปั่นป่วน

  • เกิดฉนวนสงครามฮ้ายทำลายกันบ่เว้นหว่าง

  • กลางคืนลุกเป็นควันกลางวันลุกเป็นไฟ

  • ใจคนฮ้อนอูดเอ้ามีแต่เศร้าบ่อชื่นบาน ท่านเอย

  • ทางทหารการบ้านการเมืองก็เคืองขุ่น

  • เกิดวุ่นวายอยู่ทุกหม่องได้หลงฮ้องป้าดสิโท

  • ใผก็โสสิได้เป็นใหญ่ขึ้นครองเมือง

  • เถียงกันไปเถียงกันมาโลดบ่มีแนวได้

  • เกิดฉิบหายวายวุ่นชุลมุนอลหม่าน

  • ราชการเห็นแก่ได้ไทยบ้านบ่เชื่อถือ

  • บางลุกฮื่อขึ้นต่อต้านเผด็จการปกครองใหม่

  • ใผเข้ามาก็หาหม่องสิได้ใจเลี้ยวบ่ซื่อตรง

  • พากันโกงกินบ้านฉ้อราษฎร์บังหลวง

  • บ่ห่วงเลยทางธรรมบาปกรรมสินำต้อง

  • เห็นแก่ตนและพวกพ้องพี่น้องฮ่วมสายโลหิต

  • คิดลำเอียงเห็นแก่ตัวชั่วปานใดก็ทำได้

  • จักสิว่าใผแหล่วแนวมันเป็นเหมิดทุกบ่อน

  • เอาวัวอ่อนใส่แอกล้อตำตอไม้ผัดแห่งดัน

  • อันธพาลปกครองบ้านก็คือกันให้ซอมเบิ่ง

  • สภาแตกกระเจิงยุบพรรคใหญ่ไล่พรรคน้อยคอยท่าเบิ่งเอา

  • เขาสิพากันประท้วงทั้งเมืองบ่หยุดหย่อน

  • เว้าแต่บ่อนขี้ฮ้ายขายหน้าด่าประจาน

  • กระบวนการโต้แย้งขัดแย้งทางการเมือง

  • เกิดขัดเคืองในใจใส่ร้ายกันบ่มีเว้น

  • เป็นคือแฮ้งคาบซี้นบินไปใสเขาก็ไล่

  • ตามตีเอาให้ได้บ่ยอมให้โตอื่นกิน

  • แฮ้งโตใด๋ได้ตอนซี้นคาบบินเวิ่นเทิงเวหา

  • บ่ทันดนเขาก็มาไล่ตีเอาไปจ้อย

  • เบิ่งเลือดตกยางย้อยทำร้ายกันยาดต่ำแหน่ง

  • แย่งกันไปแย่งกันมาด่ากันอยู่สู่มื้อพอปานหมื่อกับถ่านไฟ

  • อยู่ใกล้กันบ่ได้หาแต่เรื่องทางสิผิด

  • คิดอิจฉาริษยาฆ่าฟันเพม้าง

  • ใผก็หวังอยากได้เป็นใหญ่นายคน

  • ประชาชนเลยสิตายหน่ายผู้นำพาวุ่น

  • ทั้งขาดดุลการค้าเงินตราก็ตกต่ำ

  • ทุกข์ท่อใด๋ผัดแห่งซ้ำเหยียบย่ำบ่มีเซา

  • การเฮ็ดนาขายข้าวสวนปอฮั่วไฮ่

  • นายทุนเป็นผู้ขายได้กำไรแม่นพ่อค้าเขาพุ้นผู้บ่ทำ

  • พวกผู้นำเห็นแก่ปากท้องของนายทุนผัดมีค่า

  • บัดห่าของชาวนาราคาตกต่ำต้อยปานหอยน้อยเกือกขี้ดิน

  • จักแม่นซินหยังแหล่วชะตากรรมของชาวไฮ่

  • โตละเฮ็ดสิตายเขามาขายจ่ายซื้อจักใผแท้แม่นเจ้าของ

  • ของนายทุนราคาสูงเพียงฟ้าแต่ว่าของชาวนาราคาผัดตกต่ำ

  • ส่วนราคาน้ำมันแพงขึ้นนำสู่มื้อคนซื้อโลดสิตาย

  • ของชาวไฮ่ขายปลีกย่อยของพ่อค้าคนกลางส่งออกตลาดใหญ่

  • คอมพิวเต้อร์เครื่องไฟของเขามีค่าล้นของเฮาด้อยค่าบ่มี

  • ของบิ๊กซีและเซเว้นแพงไปเหมิดทุกอย่าง

  • ของพ่อค้าคนกลางแพงฮอดไม้จิ้มแข้วขายได้ทุกประการ

  • น่าสงสารแต่ชาวบ้านผู้ทำงานขั้นต่ำ

  • ผู้หาเช้ากินค่ำทำท่อใด๋กะบ่ได้เงินสิใช้กะบ่พ้อ

  • ผู้จนน้อจังแม่นจนเอาฮ้ายผู้มีหลายจนล้นหลั่ง

  • เป็นดังไหใหญ่ล้นไหน้อยผัดบ่เต็ม

  • พุทธองค์ทรงพยากรณ์ไว้สองพันปลายสิเห็นแน่

  • คนทั้งหลายสิแหนแห่นำเงินคำกำแก้วยอให้ผู้ใหญ่สูง

  • แต่ว่าฝูงคนไฮ้ชาวนาหน้าต่ำ

  • บ่มีใผสิหล่ำเยี่ยมยามจนไฮ้ดังไหน้อยแห่งไงผง

  • หงส์ผู้สูงศักดิ์กล้ากาสังมาแซมซอด

  • นอนกอดข่างแฝงซ้อนฮ่วมเตียง

  • ถาดทองคำขัดเกี้ยงเหลืองงามดูสง่า

  • หมาขึ้นไปนั่งเทิ้งเทิงขี้ใส่นำ

  • คือผู้นำปกครองบ้านอันธพาลตุ้มไพร่

  • ใช้อำนาจผิดหน้าที่หาความดีบ่ได้ใจเลี้ยวบ่ซื่อตรง

  • โต๊ะตั่งแท่นแม่นหม่องนั่งของบัณฑิต

  • แต่คนพาลมาใช้สิทธิ์ขึ้นนั่งแทนเป็นเจ้า

  • เผยคัมภีร์ออกมาเว้าเอาพระธรรมออกมาว่า

  • ประกาศศาสนาของพระพุทธเจ้าเป็นคำเว้าต่อนผญา

  • สัพพะปาปัสสะ อะกะระณัง

  • ความชั่วฮ้ายทั้งหลายให้เว้นห่าง

  • กุสะลัสสูปะสัมปะทา

  • มาทำดีทุกอย่างดังพระองค์ทรงชี้

  • สะจิตตะปะริโยทะปะนัง

  • ทำจิตใจให้เบิกบานดังพระจันทร์ใสแจ้ง

  • แพงศรีสร้อยพลอยนิลล้ำค่า

  • ศาสนาเป็นที่ยึดเหนี่ยวไว้อาศัยซ้นฮ่มเงา

  • ยึดเอาธรรมของพระพุทธเจ้าเป็นที่เพิ่งนำชีวิต

  • บ่ให้ผิดตามคำสอนที่พระองค์ทรงวางไว้

  • เฮาสิสุขไปหน้าปวงประชาเจริญฮุ่ง

  • มาบำรุงรักษาพุทธศาสน์สืบไว้ให้คนฮู้ชั่วดี

  • ธรรมวินัยสิตั้งมั่นบ่มีวันสิเสื่อมง่าย

  • ขอให้เฮาทั้งหลายมาซ่อยกันสืบสร้างทรงไว้ศาสนา ท่านเอย

  • ข้าขอน้อมกราบไหว้องค์เอกสัพพัญญู

  • พระบรมครูสอนโลกโลกากว้าง

  • สัตว์ทั้งปวงอาศัยซ้นใต้ฮ่มโพธิ์ศรี

  • พระมุนีตรัสสอนบอกทางแสดงชี้

  • ในคัมภีร์กล่าวไว้มีใจความสามอย่าง

  • เว้นจากทางชั่วฮ้ายให้เฮาสร้างตั้งแต่ดี

  • มีสติเที่ยงมั่นบ่ไหวหวั่นนำใผ

  • ทำจิตใจบริสุทธิ์ดุจดังคำในเบ้า

  • นี้เป็นคำสอนเจ้าองค์พุทโธได้ตรัสสั่ง

  • รวมทุกอย่างไว้ในสามข้อนี้พระองค์ชี้บอกทาง

  • อย่าได้ปะปล่อยว่างหนีห่างคำสอน

  • พระบวรศาสดาพุทธองค์ทรงย้ำ

  • ทำความดีเว้นชั่วฮ้ายและทำใจให้ผุดผ่อง

  • เดินตามครองของพระพุทธเจ้าเฮาสิได้อยู่เย็น ท่านเอย

  • ยามเจ้าเดินโคกกว้างให้หาฮ่มมาบัง

  • เอาพุทโธเป็นที่ตั้ง เอาธัมมังเป็นที่เพิ่ง

  • เอาพระสงฆ์เป็นประทีปส่องใต้ บอกทางให้บัดห่าหลง

  • ยามเจ้าอิดเมื่อยล้าเอาน้ำส่วยสรงสี

  • ยามเจ้ามีความทุกข์เอาพระธรรมสรงล้าง

  • ยามเจ้าหลงทางกว้างเอาพระสงฆ์มาซ่อย

  • เป็นประทีปส่องใต้พอได้ฮู้ฮ่อมทาง
Previous Post
Next Post

post written by: